నిశా వృత్త గర్భ సీసము

నిశా వృత్త గర్భ సీసము *
   
జనక తనయ రామచంద్రుండు జూడంగ సౌందర్య పాదార విందుడమ్మ !
వన ముని సుర బృంద భారమ్ము మ్రోయంగ కోదండమున్ బట్టె కోరి యతడు !
ఘనముగ దునుమాడి కాంతారమున్ ప్రత్యవస్థాతులన్ పారవశ్య మొందె!
మనవిని విను నీవు మాయమ్మశంకింప వద్దమ్మరో రామ పథము నెపుడు !

అమ్మ ‌మమ్ము గన్న యఖిలాండ నాయకీ
సదమల చరిత మృదు పాద యుగళి
భక్త తతులు గొల్చు భక్తాపరాధీన
కాంక్షదీర మమ్ము గావు మమ్మ!

గర్భిత నిశా వృత్తము (ననరరరర - యతి 9)

జనక తనయ రామచంద్రుండు జూడంగ సౌందర్య పా
వన ముని సుర బృంద భారమ్ము మ్రోయంగ కోదండమున్
ఘనముగ దునుమాడి కాంతారమున్ ప్రత్యవస్థాతులన్
మనవిని విను నీవు మాయమ్మశంకింప వద్దమ్మరో !

కాంతారము = అడవి ,ప్రత్యవస్థాతులు = విరోధులు (రాక్షసులు)